Veuraaf an de Ow Wieverbal zal veer vanaaf dit jaor ing Preenserussepsie hoate. Dis russepsie is bedoelt um Preenses Rianne I en JeugPreenses Serena I offisjeel te kinne felicitere vur de luuj die dao nog ging kaans vur hubbe gehad nao hun oetrope. Da deenk veer oonder aandere an de famillie en collega's die neet op de zitting hubbe kinne zie mè èègelik an eederèèn dèè os Preensesse nog ins de haand wille sjudde en ing goj Vastenaovend wille toeweunsje. Dat kint dan vanaaf hof neuëge pus un oor of hof tiën.

Op Karnevalsvriedig aovend is altied de Ow-Wieverbal van de Sjravelerre. Dat vind ummer plaatsj in Kaffie Quaante. Um un oor of hof tieën zal ut dao loosgoe. Momme, Ow-Wiever en aander waal of neet verkli-jde kinne zich dan oetlève op dis owwerwitsje Ow-Wieverbal. Um un oor of illuf opilluf (11.11o.) saoves zalle Preenses Rianne I en JeugPreenses Serena I depries bekind make en kinne de maskes aaf. Daonao kint nog fleenk drop los gezonge en gesjpronge were want ut is dan nog lang neet gedoe.

Karnevalszoondigmeurege begin veer mit ing Dialekmis iggen keerik. Os Hoege Hoeglustighède zulle dan same mit Groete Raod en JeugRaod nao gen keerik goe um dao zoe wie zich dat nao oad-Limburgs gebruuk huurt, de Vastenaovend in te zitte mit ing Mis. Die mis wurd in ut plat geleëze en och in ut plat gezonge dut ut koer.

Nao de Mis sjtèèt iggene zaal ut Sjpek & Ei klaor. De genuujde kinne dao dan unne gojje baojem liegke um die driej daag good deur te komme. De Preensesse hubbe dèè meurege nog un aantal decoraassies in petto vur un aantal luuj.