De aafgelope Karneval wor alwer ing um in te lieste: VIEF DAAG LAANK sjpas en plezeer make in èège dörp. Oe kint dat nog ? Ja, hie i Mhèèr bliekbaar. Want veer hubbe wer genooëte van ing fieng Ow Wieverbal mit veuraaf de ressepsie vur os Preensesse wat hiel erg gesjlaag wor, d'r zotterdig mit ing druk bezochte aovend mit ut aansjteëke van ut Sjravelerre-leech en ut opgeëve vur d'r optoch. Dan ut zoondes mit de mis, ut sjpek en ei, bezeuk an de owwer inwoenersj en dan unne fantastiesse Keendermiddig. Dan d'r groete daag mit d'r Groete Optoch oe veer i Mhèèr harsjtikke gruuëtsj op maoge zie en ut aafsjlete op d'r densdig mit hiel veul sjpas en gezellighèèd.